top of page

Saunoaga Afioga Kovana Lemanu P. S. Mauga

E foliga mai e le ‘asa se vaiaso ma le tuia o lo’u loto i lo’u faalogo i le maliu o se tasi o le atunuu, o o tatou aiga, ma a tatou uo ona o le leai o mea faigaluega e tali ai mana’oga o le tausiga o le soifua maloloina. O le faamuamua o le tausiga o lo tatou soifua maloloina o se tiute tau’ave ua tatou masani ai, ma ou te talitonu atoatoa e tatau ona mausalī lo tatou aga’i i luma ia faamautinoa le iai o le tausiga e tatau mo o tatou tagata. I lo ma so'oso'o tau’au ma le Afioga i le Kovana Lutena Talauega E. V. Ale, ua mausalī ai la’u faai’uga e fausia se falema’i fou i lo tatou teritori e mafai ona faatinoina auaunaga ua mana’omia na’uā. E faavae lenei faai’uga i faamaumauga ua i o tatou aao ma le fesoasoani e lē faaluaina, o faatupega ia mai le Tulafono o le Fuafuaga Lavea’i a America poo le ARPA - American Rescue Plan Act. Ua to’atele na’uā o tatou tagata ua maliliu i gasegase faafuase’i o le fatu ona o le leai o ni su’ega faapitoa e iloa ai ni tulaga lamatia. Ua to’atele na’uā foi o tatou tagata e lē o maua i se vaaiga faafoma’i se’iloga ua oo i le kanesa Tulaga 4 ona e leai sa tatou fale e su’e ai tulaga tau kanesa. Ua na’o i latou e gafatia le malaga i fafo e mafai ona maua tausiga faafoma’i o gasegase tugā e aafia ai uaua, musele, ma ivi, ma isi totoga; ae pagātia ai isi e lē gafatia ona e leai o ni nofoaga mo togafitiga ma mea faigaluega faafoma’i. I mataupu ta’itasi uma ia, ona pau le toomaga mo i latou e le gafatia le malaga i fafo, o le sa’ili fesoasoani i le LBJ se’ia oo ina maua se avanoa e malaga ai poo le taunuu loa i le i’uga o le gasegase.
Faamuta loa lenei pagātia. E tatau ona fai o se tautua e sili a’e mo o tatou tagata.
E tatau ona maua iinei e o tatou tagata le tausiga iloga lea a’o afifio ma alaala i o latou lava aiga, ina ia mafai ona pa’i atu ma fesoasoani o latou aiga i taimi aupito faigata o le soifuaga. Ua tupu pea le tau faaofiofi o o tatou tagata matutua i potu o faletalimalo poo faalema’i, a’o nonofo ma le popole i tulaga o gasegase, i le valavala ai i le afe ma afe o maila ma i latou e pele. Aisea ea o le a faapea ai ona pagatia i latou e pele i o tatou loto – o e ua afu le soifua i le tausiga o o latou aiga ma lo tatou atunuu – a ua feagai ma nei tulaga lē taualoa, a’o loo iai le avanoa e avatu ai lea tausiga iinei i o latou aiga? E faigofie le tali. E le tatau ona oo i latou i sea tulaga.
E le fesiligia le ogaoga o lu’itau o loo tatou feagai i le tausiga o le soifua maloloina, aepeita’i e faapena fo’i ona tele o se alaga’oa ua tatou maua. Ua i ai se avanoa lē ‘au maua e toe fafau ai le tausiga o lo tatou soifua maloloina ia lelei. O se faamanuiaga e $344 miliona ua faasoaina mai, o le 71% lena o faatupega mai le ARPA.
Ua faa’autū la tatou silasila mamao i le faateleina o avanoa e oo ai tagata uma i ia tausiga, faalautele ituaiga tautua eseese, ma ia gatusa ma tulaga aupito lelei ua iai nei atunuu i fafo mo tagata uma. E faaumiumi aafiaga o le Koviti, e ui ina ua te’a ona lamatiaga, ma ua atili aliali ai le lē lava saunia o i tatou i le tausiga o le soifua maloloina. O le faaaoga o faatupega a le ARPA e tali ai lu’itau o le faaleleia o la tatou falema’i e tasi, ma le faaopoopo o se falema’i fou faapitoa, o le a mafai ai ona tali mana’oga o le lautele o lo tatou atunuu e lē o tutusa avanoa latou te gafatia.
O le LBJ lava le maa tulimanu o lo tatou soifua maloloina, ma ua faatulaga le $100 miliona e galuea’iina ai lona faaleleia. E aofia ai i lea fuafuaga le siisii o vaega aupito ogaoga, e pei o le faalauteleina o le potu talavai faafuase’i ma le ICU, le faaleleia o vaega faatino galuega i le LBJ ma le Matagaluega Soifua Maloloina, ma le faatosina mai o tausi soifua faaporofesa. O ia taumafaiga o le a faatupu malosi i le LBJ ia siisii a’e le tulaga o lana tautua i mana’oga eseese o le mamalu lautele.
O le faatāuaina o le i ai o ituaiga tautua eseese ma le faaopoopoina o tautua e ofo atu ua faatulaga ai le $200 miliona mo se falema’i fou o tautua faapitoa, e faafoe e le Komiti Faafoe o le Galuega.
O lenei taumafaiga, ua lē na’o na fausia o se fale; a’o le ofoina atu o togafitiga ua faasili a’e ona lelei, faatasi ma tautua e lē o mafai nei ona maua i lo tatou itulagi.
Na mae’ae’a ma tofu sao uma le soalaupuleina o lenei faai’uga. I le galulue felata’i ma le Komiti Faafoe o le Galuega ma le Soakomiti Tau Foma’i, ua ou mautinoa ai o le falema’i fou lenei o le laasaga ua tonu mo le aga’i i luma. Ua manino la tatou sini autu: ia faaitiitia le mana’omia o le auina atu i fafo, ma ia aumaia tautua faafoma’i mauagatā i lo tatou lotoifale. O lona uiga o le a faaititia aiga e feagai ma le filifiliga faigata o le tuua o le teritori mo togafitiga i fafo, ma ia faaopoopo avanoa mo i latou e le o gafatia le tau o le saili atu o le tausiga faafoma’i i se isi atunuu.
Ou te fia faamautinoa atu le faaaogaina ma le tonu ma le lē natia o tālā ta’itasi. O le ripoti a Inisinia o le Ami na tuuina mai i le 2019, sa lima ta’ita’iina ai la matou filifiliga, ma matou te faailoa atu le ono i ai o fesuia’iga e mana’omia mo tulaga o le faagasologa o fefaataua’iga.
O a’u toe upu e faapea, o le fausia o lenei falema’i fou e le na’o le faaleleia o le tino mai o lo tatou lotoifale; a’o le tuuina atu o se malosi mo le soifua maloloina ma le manuia o ō tatou tagata. O lenei taumafaiga e o gatasi ma le taga’i mamao ua faataatia i le Fuafuaga a Amerika Samoa o le
ARPA, ma o le ta’utinoga o lo tatou tuutoina mo se lumana’i maloloina ma le malosi. O lo tatou galulue faatasi e fausia ai se faafanua o le soifua maloloina e avea ma moli ta’iala i le tausiga o soifua, o le alofa, ma le alualu i luma e lē na’o Amerika Samoa, ae mo le Pasefika.


S001-09012023 Saunoaga Afioga Kovana Lemanu P. S. Mauga
.pdf
Download PDF • 87KB

7 views0 comments

Comments

Rated 0 out of 5 stars.
No ratings yet

Add a rating
bottom of page